60度慢煮豬鞍伴蘋果蓉醬（附食譜）

今朝一早出咗去探朋友剛出世嘅BB，下午honey放假就去咗拍拖。為咗去完街返屋企可以好快開飯，我早一晚醃定豬鞍，今早出街前用慢煮棍慢煮2個鐘，一返到屋企就可以洗米放入蒸爐蒸飯，同時間就煎香塊豬鞍同煮醬汁同炒個菜芯。好快就開到飯😁

 

慢煮豬鞍伴蘋果蓉醬 

材料：

豬鞍 1塊

蘋果 1個

檸檬汁 約半茶匙

蒜頭 1粒

牛油  少許

肉桂粉  約1－2茶匙

麝香草(thyme) 1茶匙

牛至 (Oregano)  1茶匙

橄欖油 1湯匙

鹽 1茶匙

黑胡椒粉 少許

豬鞍做法

1) 先淨豬鞍，印乾水

2) 將蒜頭一開二，用切口那邊均勻塗抹豬鞍2面，每邊落半茶匙鹽和黑胡椒粉，

 

3) 之後每邊落半茶匙牛至 (Oregano) 和麝香草(thyme)，

 

4) 豬鞍入真空袋，落1湯匙橄欖油和檸檬汁，將剛才的蒜頭切碎放入一起，之後抽真空醃至少2個鐘，

 

 

5) 醃好豬鞍後，用60度水慢煮2個鐘 （時間視乎豬鞍厚度）

6）煮好後取出豬鞍，印乾水及撥走表面嘅醃料

 

7）中猛火燒熱煎pan, 落油，再放豬鞍先煎每邊1分鐘至表面有微焦（需要目測）

 

8) 煎好後將豬鞍放上碟rest約5分鐘, 之後做蘋果醬汁

9) 最後蘋果醬汁淋上豬鞍，蘋果蓉拌碟，即成

蘋果蓉醬做法：

1) 蘋果去皮，切件

2) 中火燒熱鍋落少許牛油

3) 落蘋果件炒至每件蘋果沾滿牛油，之後加1茶匙糖拌勻，再加約60g水

 

4) 蓋上蓋轉小火煮約15分鐘令蘋果煮軟身，之後將蘋果壓蓉

5) 之後加入肉桂粉拌勻，備用

 

honey 好鍾意個玉桂蘋果蓉醬😂

蘋果醬汁料

蘋果汁  2湯匙

砂糖     1茶匙

白蘭地 少許

中火燒熱小鍋後落少許牛油，加2湯匙蘋果汁及少許白蘭地酒，轉大火煮至醬汁收減即成

 

整完呢個，快手炒埋碟菜同砌好現成嘅活蝦刺身就攪掂.......  開飯😁

 

 

 

 

雖然餐晚餐唔係好特別，但2口子邊食邊飲Sake邊傾偈，已經好開心😊 

自家製無糖花生醬

一直都知道市面上嘅花生醬添加了好多化學嘢，長期食用化學嘢對身體非常唔好。雖然我同honey平時好少食花生醬，但當自己可以整到，又唔難整時，我會嘗試去整😊

剛好近日見谷友分享了整花生醬，就根據谷友提供嘅食譜，再自行微調後就做咗呢個屬於適合我口味嘅花生醬😁 

材料簡單，又唔複習，只係要用點時間而已。食完呢樽後，會再整過😊

 

無糖花生醬

材料：

花生（無衣）100g

橄欖油 約10g

* 因為買唔到無衣花生，我今次用的是萬里望花生，自己剝殻剝皮

 

做法：

1）花生入焗爐以140度焗60分鐘後取出放涼

 

2）將花生放入攪拌機，先以慢速打碎花生（打了不久後，花生就會出油），之後慢慢加入橄欖油繼續攪拌至滑身。之後試味，可隨喜好加入糖/鹽調味。我今次完全無加糖/鹽。

* 油越多，會越滑（自行微調）

3）倒入已消毒的玻璃瓶後完成，請放入雪櫃保全。

P.S 若加糖，比例為花生的1/10 或 1/5放糖，隨個人喜好加入

杏汁鮮奶煮雪燕（附食譜）

近日上網見各大家庭主婦都討論雪燕，連我幫襯開買乾貨糧食嘅金飯碗都有得賣。再細看下，原來係肥媽近日教整平民燕窩😄 見好似好易整，就貪得意買咗包返屋企試吓😁 honey食咗都話好正😂😂

根據上網資料：

雪燕為珍貴的植物木髓分泌物，是一種新型滋補養品。因泡發後晶瑩剔透與燕窩較像，故取名雪燕。雖然似燕窩，功效更勝燕窩；經研究含有多種珍貴營養，具有補水保濕，減脂潤腸，提高人體免疫調節，增強兒童大腦開發，抑制癌症之生長及轉移，調節人體膠原蛋白生長，使皮膚豐滿、緊實有彈性等功效。功效顯著，受人追捧。

雪燕的食用方法 ：

雪燕泡發倍數為30-50倍。食用時：按每人每次3克，置於水中泡發6小時後，清水沖洗3遍後，用鑷子揀出樹皮等雜質。置於燉盅中燉煮30分鐘即可。

因我從未接觸過雪燕，所以今次的做法是跟肥媽在節目中介紹的做法來做的，她的食譜如下。

 

杏汁鮮奶雪燕

材料:

南杏160克

北杏40克

雪燕30克

冰糖40克

鮮奶200毫升

做法:

1. 雪燕浸發6至8小時後，挑走雜質後清洗乾淨，備用。

 

 

2. 南北杏浸泡後蒸熟，備用。

3. 將(2)放入攪拌機，加入適量水，攪成杏汁，備用。

 

4. 燒開1-2杯水，放入冰糖煮溶，加入(1)及(3)。

 

5. 中火煲約15分鐘（唔好大滾），加入鮮奶拌勻，即成。

 

* 雪燕不可煮超過30分鐘，否則有溶晒入水中

** 因北杏帶有毒性，準備南北杏份量應以8份南杏，2份北杏

其實雪燕還有很多不同做法，下次可以嘗試唔同做法，還可以帶給家人新鮮感😊

雪燕的食譜 ：

1）糖水雪燕：

按每人3g雪燕,開水浸泡6小時後盛入燉盅內，加純淨水至沒過食材，小火慢燉20分鐘後，加黃冰糖即可食用。

2）牛奶燉雪燕：

按每人3g雪燕,開水浸泡6小時後盛入燉盅內，加純牛奶至沒過食材，小火慢燉20分鐘後，加黃冰糖即可食用。

3）雪燕木瓜盅：

按每人3g雪燕,開水浸泡6小時後盛入燉盅內，加水沒過食材，小火慢燉20分鐘後備用。燉煮雪燕同時，取木瓜一個，豎向切去三分之一，用勺挖瓤洗淨做盅。將雪燕倒入木瓜盅小火再燉10分鐘後加黃冰糖即可食用。

鹽油焗奄仔蟹 （附食譜）

上星期朋友們嚟食完鹽油焗蟹後，都話好好味，紛紛想學呢個菜😄其實呢個菜無任何難道，只要學懂劏蟹就零失敗率😂😂 朋友聚會又可以多樣快煮慢食嘅餸了😁

 

鹽油焗奄仔蟹

材料：

奄仔蟹  4隻

乾蔥  3-4粒 （切幼條）

薑片 6-8片

焗蟹調味：

粗鹽  １包

五香粉  1茶匙

紹酒 約１湯匙

* 約蟹份量多於4隻，調味份量能增加（請先行微調）

1）原隻蟹洗淨擦乾，不要折捆繩。放入冰格１５分鐘把蟹雪暈。取出蟹1開2去肺及切件備用**

2）燒熱鑊落約1湯匙油，爆香乾蔥及薑片

3）加入粗鹽及五香粉，用中小火慢慢把鹽炒香約２，３分鐘直至見鹽變微焦和變色（此時燒熱咗嘅鹽非常熱，小心鹽會彈上嚟灼傷）

4）將蟹放入並砌回蟹形，再把鹽將蟹覆蓋（小心不要將鹽撥入蟹肉入面，否則過咸）

 

5）蓋上蓋，用小火先焗煮１５分鐘

6）之後開蓋源著鍋邊圍圈倒入紹酒，再即時蓋上蓋繼續小火再煮５分鐘，之後熄火再焗2分鐘

7）撥開鹽後就可以上檯

* 劏蟹：蟹先不要鬆綁，反轉蟹，蟹肚向上，用菜刀在蟹肚中間位置下刀直至感覺到已將蟹一分為二，但不要切爛蟹蓋（因為蟹嘅心臟在肚尖位，用呢個方法可以一刀解決隻蟹，免得隻蟹多受苦）當蟹已經唔郁後，就可以鬆綁，去肺同稍為拍開蟹箝

** 蟹劏好後一定要在30分鐘內煮，否則會產生毒素（請謹記）

涼拌醬汁茄子 （附食譜）

昨晚表哥表嫂一家嚟食飯（我同honey平時去佢地到痴餐痴得多，係時候要煮飯邀請佢地嚟食返餐喇😂😂）

相比起表嫂呢位廚神級嘅煮婦，我呢餐飯簡直小巫見大巫，所以要用點心思諗吓煮乜比佢地食嫁😊 為免要佢地食平時一般嘅嘢，所以決定整多幾多涼菜，又適合咁熱嘅天氣。好好彩，大家都對呢涼菜有唔錯嘅評價😊

 

涼拌醬汁茄子

材料：

茄子1條（選較直身的，切去頭部備用）

醬汁：  

蠔油3湯匙

生抽1湯匙

沙糖1.5湯匙

魚露少許

檸檬汁少許

麻油少許

芫茜碎少許（上桌時才洒上）

做法：

1) 先燒熱一鍋熱水，把整條茄子放進已煲滾嘅水中，以中火煮5-6分鐘（其間要用鍋鏟按住茄子，不要讓茄子浮上水面，否則茄子會變色）

2) 將茄子撈起，立即放入冷水（我用冰水）中浸10-15分鍾降溫，撈起輕力略為渣乾水分（要輕力，太大力否則茄子皮會爛）再以刀切成小段

3) 放在雪櫃雪至少一小時，上檯時淋上醬汁，再灑少許芫茜便完成

* 芫茜有提升食物本身香味嘅作用，建議要加來提升香味

** 不同品牌嘅調味料鹹味不一，要自行微調醬汁味道😁

涼拌小青瓜 （附食譜）

昨晚朋友嚟食飯兼傾吓我地嘅旅行行程，我以我同honey平時晚餐2個餸嘅standard，4個人就煮咗4個餸，點知原來朋友咁細食😂食淨咗好多排骨同雞翼😆 自從做咗家庭主婦後，我係唔會浪費廚餘嘅！一於留起用嚟第二晚整涼瓜炆排骨搭多2隻雞翼😂😂😂 

因為已經有涼瓜關係，為免又煮多咗菜，一於用埋前日買嘅小青瓜嘅整個涼菜，好味又開胃😋（自我感覺良好😂）無論邊個季節食都適合。

 

材料真係簡單到震......

材料：小青瓜 4-6條

調味料：

豉油 1湯匙

魚露 1湯匙

紅糖  3 茶匙 

檸檬汁 1 湯匙 

蒜頭 3-4粒 （略拍及切大粒）

麻油 少許

做法：

1）小青瓜用熟開水洗淨印乾水

2）切小塊後拌入調味料放雪櫃最少3小時

3）吃前隔掉少許汁，加入麻油就完成

68度慢煮叉燒（附食譜）

之前喺Facebook Group 到見谷友分享慢煮叉燒，參考咗咁多食譜後，都心郁郁想試吓整😁 加上honey𥄫到我睇人地分享嘅叉燒，一直不停𠼱我整比佢食😂😂

好啦！就試吓整吧😄 前日去街市買餸時就買舊梅頭試整，心諗如果成功嘅話下次就買舊黑毛豬梅頭再整啦😁

好好彩，honey食咗第一舊已經話好好食，好鬆化同好香！好開心，佢比咗信心我去再整😊

 

材料：

梅頭1斤 

叉燒醬3湯匙

玫瑰露2茶匙

蜜糖  約2-3湯匙 

做法：

1）梅頭洗淨印乾水後，將叉燒醬及玫瑰露搽勻梅頭肉後，入真空袋抽真空醃一晚

 

2）慢煮棒調校68度8個鐘，當溫度到達68度時，放真空了嘅梅頭落水（水要浸過肉）

3）8個鐘後取出梅頭，印乾水，每邊搽勻蜜糖 （若用蜜芽糖，要先用熱水開）

 

4）焗爐用200度預熱，放已搽蜜糖嘅梅頭先焗一邊10分鐘至肉邊有微微燶，之後反轉再焗另一邊約7-10分鐘（目測夠上色就可熄機）

 

5）取出放涼切件後就可以上檯

 

 

Remark: 每部焗爐溫度都有差異，請自行調校😊